Kryeministri i Kosovës, Albin Kurti, ka deklaruar se paralelisht me reformat e përgjithshme, janë duke punuar edhe në drejtim të mbështetjes së komunave dhe shtimit të shërbimeve publike si dhe rritjes së cilësisë së tyre
Këtë deklaratë Kurti e ka bërë të premten, kur bashkë me zëvendëskryeministren dhe ministren e Punëve të Jashtme dhe të Diasporës, Donika Gërvalla Schëarz, dhe ministrin e Administrimit të Pushtetit Lokal, Elbert Krasniqi, morën pjesë në shënimin e 21- vjetorit të themelimit të Asociacionit të Komunave të Kosovës.
“Si rritje rekord të të hyrave buxhetore, Granti i Përgjithshëm për vitin 2023 është miratuar nga Komisioni i Granteve me një rritje prej 32%. Pra, kemi ndarë rreth 255.2 milionë euro më shumë buxhet për nivelin komunal’, tha kreu i ekzekutivit.
Sipas kryeministrit, për përparimin më të shpejtë e me cilësi më të madhe të komunave kanë rëndësi që të gjithë, secila kategori shoqërore, por ai veçoi mërgatën, gratë dhe rininë. Këto janë tri kategoritë kryesore shoqërore që i bëjnë reformat e thella aq shumë të domosdoshme në vendin tonë, shtoi ai.
Kryeministri Kurti u tha kryetarëve të komunave se si Qeveri do të dëgjojnë me vëmendje nevojat, kërkesat, por edhe idetë e tyre.
“Komuna është e përbashkët, andaj siç jemi bashkë në këtë 21- vjetor të Asociacionit të Komunave të Kosovës, le të jemi për çdo ditë në shumë e shumë vite në vijim”, u shpreh ai në përmbyllje të fjalës.
