Kryeministri Edi Rama ka folur në konferencën e përbashkët me ministren e jashtme Olta Xhaçka, për konfliktin Rusi-Ukrainë, ku sipas tij Shqipëria do të jetë në një qëndrim të bashkërenduar me Shtetet e Bashkuara të Amerikës.
Rama: Së pari dëshiroj që të theksoj që qëndrimet tona lidhur me këtë çështje, në vijim janë të qarta, janë të njohura, janë të pandryshuara. Dëshiroj të theksoj se në këndvështrimin tim, rruga për të adresuar këtë tension që rritet çdo ditë, dhe këtë konflikt që është burim tensioni, është rruga e bisedimeve, i gjetjes së arsyes për të biseduar, dhe për të kërkuar pikat e përbashkëta, që në dukje janë tejet të vështira për tu gjetur. Besoj se çdo shqiptar që ndjek ecurinë e Shqipërisë në arenën ndërkombëtare, sot duhet të ndjehet mirë dhe i vlerësuar.
Nuk jemi në fushën e qokave, këtu bëhet fjalë për të krijuar një dyshe që do të angazhojë Këshillin e Sigurimit të Kombeve të Bashkuara, për këtë temë dhe jo vetëm. Do të kemi mundësi që të luajmë një rol. Sa i takon aspekteve të tjera, unë nuk dua të bëj komente, unë mund të them vetëm kaq, ne jemi shumë të qartë në pozicionin tonë, në modestinë e peshës sonë në këtë përballje elefantësh, ne ruajmë të drejtën të themi bisedime, bisedime, bisedime.
Xhaçka: Ne kemi qenë plotësisht të angazhuar në trajtimin me përparësi të situatës në Ukrainë, qëndrimet tona kanë qenë publike, dhe janë bërë prezente dhe në OKB, ne Shqipëria, kemi vendosur theksin te uniteti mes vendeve të NATO-s, lidhur me Ukrainën, qëndrimet tona kanë qenë në mbështetje të sovranitetit territorial. NATO është një aleancë mbrojtëse, NATO nuk kërcënon as Rusinë, dhe asnjë vend tjetër, qëndrimi ynë ka qenë për uljen e tensioneve, kemi pasur qëndrim koherent për këtë çështje.
Ne kemi pasur disa shqiptarë në Ukrainë dhe në Kiev.
