Kryeministri në detyrë i Kosovës, Albin Kurti ka folur sot rreth largimit të rrethojave në oborrin e Qeverisë së Kosovës, për të cilën nga Policia e Kosovës është thënë të mos hiqen për arsye sigurie.
Kurti në një konferencë tha se drejtori i Policisë, Rashit Qalaj i kishte rekomanduar ushtruesit të detyrës së ministrit të Punëve të Brendshme, Xhelal Sveçla të mos largohen rrethojat te objekti i Qeverisë dhe Kuvendit.
Sipas Kurtit, Sveçla i ka shkruar një kërkesë një instance brenda ministrisë që ai udhëheq për heqjen e rrethojave, për të cilat tha se është dashur të largohen më herët.
“Mbase i kemi hequr vonë”, tha Kurti.
Sipas tij, çështja e sigurisë është trajtuar me kujdes dhe se nuk ka mungesë sigurie.
Kryeministri në detyrë tha se mes Qeverisë dhe sheshit të qytetarëve nuk duhet të ketë pengesa.
